【Now財經台】美國聯儲局剛結束嘅議息會議，係啟動加息周期以來最受關注，因為係歐美銀行連環出事後首個議息會議，到底聯儲局會唔會按兵不動，令市場有喘息空間，還是繼續加息，展示遏通脹決心，結果一如市場預期加息0.25厘，點解讀局方呢個決定？
臻享顧問董事總經理王良享指，如果睇返最新嘅點陣圖，聯邦基金利率中位數預測仍然係5.1厘，即貫徹去年12月嘅睇法，今年唔會減息，而明年底預期利率4.3厘，去年12月係4.1厘，反映聯儲局委員對美國經濟睇法仍然唔錯，減息只係預期明年通脹回落速度較快，所以今次議息似乎冇乜考慮過去3星期發生嘅事。
Tommy又話，今次接連有銀行出事，市場認為只係短期流動性問題，但當利率成本冇下降，就會收緊貸款標準，主席鮑威爾亦承認金融條件收緊，但又話仲有時間再觀察，睇下對經濟有咩影響，佢認為咁嘅反應係非常慢。
