【Now財經台】騰訊控股(00700)持股逾20%嘅同程旅行(00780)，業績後價量齊升，今朝一度炒高10%，高見17.1元，成交股數較過去100日同時段平均增1倍。
同程旅行噚日收市後出咗上季及去年業績，雖然上季收入按年跌19%，經調整淨利更大跌85%，但摩根士丹利指業績未完全反映內地開關因素，又話表現對辦。
市場依家觀望緊全面開關後首個「五‧一」黃金周嘅出行數據，會唔會帶挈同程旅行股價造好，但股價暫時仲未企穩16.7元，即100天線，但以1支大陽燭突破下降通道，14天RSI亦突破前頂，重上50以上，反映上升動力轉強。
