【Now財經台】截至早上11時止，1小時內《彭博》用戶關注度上升最多港股，依次為海底撈(06862)、 友邦保險(01299)、安踏體育(02020)、騰訊控股(00700)、中國恒大(03333)。
內需股持續弱勢，上周五上榜嘅李寧(02331) 業績差，拖累股價一度錄雙位數跌幅，今日仍未止跌，同業安踏都上埋榜，公司聽日就會出業績，係咪好大機會同李寧一樣咁差？
富昌證券聯席董事譚朗蔚指，李寧業績大數未必真係好差，但毛利率跌逾4%，一直話復常，預期消費會增加，結果不似預期。佢又話，李寧、安踏呢面對同一個市場，李寧有「國潮品牌」做護身符，業績都咁差，安踏嘅情況似乎都好難樂觀。雖然安踏股價今日跌，但未至於低開低走，加上市場都唔肯定佢係咪同李寧一樣，所以暫時持審慎態度。
譚朗蔚又話，安踏股價2月初已跌穿重要嘅20天線，同大市一齊經歷咗一輪跌浪，喺102元水平橫行咗兩個月，但依家都跌穿埋，向下望住91元水平，除非聽日交到一份好好嘅業績，否則，唔好亂撈底。
