【Now財經台】受瑞信危機影響，恒指不斷刷新即市低位，連部分業績交到功課嘅股份都難逃一跌，當中包括香港小輪(00050)，股價今朝一度挫逾10%，失守7元關口。
香港小輪上星期5出咗業績，去年純利大增10倍，派末期息15仙，加埋紀念集團成立100周年嘅1元特別息，全年派息1.25元，以上周5收市價7.8元計，股息率有16厘。
香港小輪今日1支大陰燭急挫，一度下試250天線，14天RSI已跌到24嘅超賣水平，不排除短線有技術反彈。想收息嘅投資者留意除淨日喺6月5日，即係6月4日或之前就要持有或買入股份。
