【Now財經台】香港中華煤氣(00003)旗下的港華智慧能源(01083)噚日收市後率先放榜，股價今日逆市急跌，低開1%後，跌幅一度擴大至逾13%，低見3.37元，跌至逾3個月低位。港華今日失守晒所有移動平均線，錄得1年以來最大跌幅，1支大陰燭跌穿保歷加通道底，預示後市跌幅或會擴闊。
港華去年整體燃氣銷量增長5%，營業額增長17%至200億元，但由於佔持股25%嘅上海燃氣錄得逾5億元虧損，拖累純利按年倒退23%至9.65億元。
集團同時宣布退出於上海燃氣嘅投資，花旗估計交易會錄得一次性虧損，不過，集團指有信心可取回47億元嘅注資成本，算係全身而退，有助消除呢個一直錄得顯著虧損嘅項目。
摩根士丹利報告指，相比其他燃氣股，港華工商業客戶佔比重，未來銷氣量會面對更大嘅下跌風險。未來留意集團今年12%嘅燃氣銷量增長目標能否達標，甚至俾到市場驚喜，令之後股價可以有返起色。
