【Now財經台】在港上市多隻國際保險股今朝全線受壓，跌幅比較顯著係保誠(02378)，早段一度失守紅底股，曾低見99.7元，其後跌幅略為收窄，股價重上100元。
保誠噚日中午出咗全年業績，去年轉賺近10億美元，今年首2個月首年標準保費按年增長15%，大和認為，隨著內地經濟復常，第1波內地客戶會係高端客，對儲蓄險類產品需求較大，帶動保誠嘅首年標準保費增長，又認為近期股價回調純粹受個別事件影響。
保誠股價已退守250天線，即99元水平後明顯搵到支持，14天RSI已跌至26嘅超賣水平，股價會唔會出現技術反彈，要睇歐美銀行危機短期內會唔會惡化，拖累國際金融股表現。
