【期匯決算】美銀行「出事」聯儲局勢減慢加息

【Now財經台】美國銀行業危機引發嘅市場恐慌情緒，加上美國2月CPI升幅放緩，市場普遍預期，聯儲局下周最多加息0.25厘，美國今晚會出2月PPI及零售銷售數據，銀行業危機似乎受控，聯儲局係咪有條件維持加息步伐？

東亞銀行財富管理部高級投資策略師黃燕娥指，SVB等多家銀行出事，令人質疑聯儲局之前嘅加息步伐係咪太快，所以市場對加息嘅預期都出現好大變化，由之前估計加息0.5厘，到最新80%機會僅加息0.25厘，相信加息步伐將會放慢，短期會對美匯指數構成壓力，但喺103會有支持。