【Now財經台】港交所(00388)今個月會修例，准冇盈利科技公司來港上市，即特專科技企業，目的係增加嚟香港上市嘅科技公司數目，之前生物科技股(B仔股)都有炒作，但熱情好快冷卻，今次修例對港交所及港股嘅刺激作用值唔值得憧憬？
英皇證券研究部總監陳錦興指，需視乎改革後嘅市場氣氛及投資情緒，一般嚟講，B仔股初期表現都唔好，但當投資高科技及生物醫藥嘅氣氛返嚟，情況就會轉好，雖然走勢較為波動，但仍吸引到部分專業投資者。
Stanley認為，同樣情況會出現喺特專科企，但要留意，特專科企係針對香港市場較少見嘅公司，例如AI、雲端等高端科技公司，有多啲新型企業有助吸引唔同類型投資者、基金，但依家港股氣氛偏弱，特專科企可能較慢熱。
