【Now財經台】截至早上11時止，1小時內《彭博》用戶關注度上升最多港股，依次為香港寬頻(01310)、騰訊控股(00700)、港交所(00388)、中國平安(02318)、美團(03690)。
香港寬頻之前獲I Squared Asia睇中，給予收購估值或達10億美元，據外電報道，最新被私募基金PAG睇中，對比返本港其他電訊商，預測股息率10%，香港寬頻有咩咁吸引？
光大財富證券策略師伍禮賢指，吸引嘅地方係股息收益率，因股價跌幅較大，2020年至今累跌近50%，各大電訊商面對嘅宏觀環境相若，但香港寬頻曾改派息政策，派息比率由90%降至75%，令股息收益率變返吸引。
Kenny又話，香港寬頻業務構成有本身特色，分為商用、住宅及移動服務，其中商用服務佔比持續上升，令唔少同行及投資基金睇好，因為疫情後辦公方面嘅寬頻需求大咗，2022年商用寬頻佔比近60%，因此，股息收益率及業務構成係比其他電訊商吸引嘅地方。
