【Now財經台】B仔股博安生物(06955)今朝平開後，好快有買盤跟進，股價一度飆70%，高見25.2元，創上市新高，仲多次觸發市調機制，其後升幅顯著收窄，成交股數較過去100日同時段平均大增15倍。
博安噚晚發通告，指由集團研發用來醫治眼疾嘅阿柏西普眼內注射溶液「BA9101」，喺中國第3期臨床試驗已完成受試者入組，市場憧憬「BA9101」好快可以搶佔百億美元市場分額。
受消息帶動，博安股價今日破頂之餘，仲收復埋19.8元嘅招股價，值得留意係，博安基石投資者嘅股份，禁售期6月底就會屆滿，有機會趁機出貨套現，有貨嘅投資者要留意。
