【Now財經台】截至早上11時止，1小時內《彭博》用戶關注度上升最多嘅港股，依次為碧桂園(02007)、騰訊控股(00700)、中國海洋石油(00883)、美團(03690)、比亞迪股份(01211)。
內房及內房相關股接連發盈警，碧桂園、旭輝控股集團(00884)都係今日焦點，市場對內房盈警潮似乎已經有一定心理準備，碧桂園今朝曾跌逾5%，低見2.07元，依家跌幅收窄，不過，今朝低位較去年底配股價2.7元，跌幅近24%。市場係咪已接受會有盈警潮，但之前配股價就愈行愈遠？
富昌證券聯席董事譚朗蔚指，之前係碧桂園服務(06098)，依家又輪到碧桂園，其他內房及物管都可能牽涉，爆發盈警潮。內房去年11月內房一路炒上，一啲中小型內房股價甚至翻一番，當時係受惠於中央出手救爛尾樓嘅消息，未有關注內房建樓、賣樓嘅本業恢復未。中國地產美元債ETF喺過去1個月已經完咗升勢，甚至有唔同程度嘅減弱，見到信貸方面嘅炒作已經告一段落，依家要回歸本業，估計嚟緊內房及物管都會有利淡消息。
Stevan又話，碧桂園去年11月見頂後一直橫行，唔止冇跟大市繼續升，依家更跌穿咗橫行嘅底，今日冇跟大市升，可見股份弱勢，有向下行嘅可能性。
