【now.com財經】今朝揀咗恒指牛(67110)同恒指熊(55240)出嚟，以五分鐘圖保歷加通道中軸做界線，過嘅出好倉；唔過嘅出淡倉，好簡單啦；但On top喺出好倉上加多一個後續條件，就係過得到中軸而出好倉嘅，最多只係博到上保歷加頂線，除非去到頂線之後，保歷加通道口有見拓闊，再比位指數行啦，否則見好即收。點多只係喺好倉上另加條件？因為唔覺得佢會忽然爆上囉。
睇返恒指五分鐘圖，喺11點5分見到指數確認重上保歷加中軸以上，按照策略呢個時侯的確可以出動隻(67110)，以11點5分如常加上10分鐘作為入貨時間的話，即11點5分至11點15分，期內(67110)高低位做過0.069元/0.062元，平均入場為價0.0655元。
不過，指數上過中軸後並無預期般向住保歷加頂線出動，而且通道亦一直只係保持窄度橫行，(67110)再係咁磨落去都唔會有好結果，喺11點40分，指數緩緩向下穿返中軸以下水平，(67110)亦無得留低，同樣以10分鐘作為走貨時間的話，即11點40分至11點50分，(67110)高低位做過0.06元/0.058元，平均走貨價為0.059元，呢一趟平均輸6格或11.02%，今個3月份又變返做食白果；還好作戰室今朝早同大家一齊食咗轉勁熊。
今朝早欣賞過恒指日線圖用咗1.5年時間精心部署嘅大型「頭肩底」依家去到咩階段，的確如果係要做右肩的話，指數仲有少少空間可以比佢再落嘅。而下半場返嚟之後見指數跌幅又再次擴大咗，而喺五分鐘圖上見指數有兩次企圖想上返中軸但都係唔成功，唔通有第三次不過中軸，然後指數又重複噚日下半場嘅動作多一次？
兩手準備嘅策略仍可取，但速度上比朝早要更快，因為今日星期五，一過夜就過Weekend，且戰且走，爬格為上。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
