【Now財經台】電視廣播(00511)(TVB)跨界同淘寶合作搞電商直播，噚日首場直播累計觀看人數逾485萬人，銷售額突破2350萬元，TVB股價5連升後，今日曾逆市爆升近1倍，高見14.36元，創3年新高。公司由2018年起連年蝕錢，今次係咪搵到扭虧出路？
博威環球資產管理金融首席分析師聶振邦認為，電商直播收入有望成為公司新嘅增長引擎。雖然未知TVB同淘寶點分紅，但佢保守估算，如果今年餘下47場直播平均仍有過千萬元銷售額，起碼有5億元嘅營業額帶動TVB業績。
佢又話，市場可能憧憬TVB靠直播帶貨提升喺大灣區嘅認知度，並指直播受歡迎有助提升內地人對TVB節目嘅關注，或帶動公司廣告收入上升。
香港科技探索(01137)都唔執輸，指旗下直播購物頻道HKTV LIVE會喺下月中試播。聶Sir就認為，HKTVmall唔似TVB有觀眾基礎，成本效益冇咁高，對業務發展前景有保留。
