【Now財經台】雖然港股今日大跌，但有唔少股份異動，當中包括午後突然大幅抽高嘅華人置業(00127)。
華置股價今朝輕微低開後，上午都冇乜動靜，交投都好淡靜，不過，午市突然抽升，一度高見3.45元，勁升近37%，之後升幅收窄，收市報3.1元，大升23%，成交股數較過去100日同時段平均大增11倍。
集團上月底發咗盈喜，預期去年業績扭虧為盈，最多賺逾12億元，估計最快周五就會出業績，公司賺返錢，似乎可以憧憬恢復派息。值得留意係，華置2021年私有化失敗後，至今已相隔逾1年，有資格捲士重來，要留意由「大劉」太太陳凱韻打骰嘅華置會唔會重提私有化。
華置股價今日急升有成交配合，但RSI即升至超買水平，股價今日異動原因未明，可能要等埋業績，再睇下公司係咪有其他動作，再考慮值唔值得部署。
