【Now財經台】電視廣播(00511)(TVB)噚日喺淘寶平台舉行首場直播，首6個鐘銷售額突破2350萬人仔，股價今日連升第6日，至於單一大股東同樣係黎瑞剛嘅邵氏兄弟控股(00953)，今朝高開後，升勢如坐火箭，唔夠1個鐘已經倍升，一度高見0.33元，飆1.7倍，成交數股較過去100日同時段平均激增1300倍，14天RSI升至91嘅極超買水平。
邵氏兄弟同TVB係關聯企業，業務上唔多唔少會扯上關係，前者製作出品嘅劇集，會安排喺TVB旗下收費及免費頻道播放，而多名藝人同TVB完約後，都簽咗邵氏兄弟。今次TVB夥拍淘寶搞直播帶貨，令市場重新關注TVB，更發現早已聚焦內地發展嘅邵氏兄弟可能有巨大潛力。
