【Now財經台】中國中車(01766)今朝輕微低開，不過，喺資金追捧中字頭股嘅氣氛下，股價好快就倒升，最多升近4%，高見4.42元，收市報4.25元，微跌0.2%，成交較過去100日同時段平均大增5倍。
中字頭股踏入3月「兩會」會期後齊齊發力，中車係其中之一，短短5個交易日累升最多23%。
最新行業分析報告指，隨著內地解除防疫措施，出行需求大增，或加快鐵路設備更新及需求復甦，中車年初公布，舊年10月至今年1月已經簽咗約300億人仔定單。
雖然中車基本因素有改善，但技術走勢就麻麻，股價升上近3年高位後，今日喺高位開出十字星，意味可能會轉勢，加上RSI噚日升至86水平，係2015年以來最超買，技術指標明顯比較負面，短期宜先觀望比較穩陣。
