【股市脈搏】越秀交通基建狠削派息拖冧價？

【Now財經台】越秀交通基建(01052)股價今朝低開4%後, 跌幅好快擴大至逾11%，低見4.15元，成交股數較過去100日同時段大增逾9倍。

公司噚日收市後出咗去年業績，全年少賺69%，值得留意係，公路股一向靠派息吸引投資者，但越秀交通基建大減派息，全年派息按年大減逾60%，唔多唔少都會令市場失望。

越秀交通基建股價今日喺大成交下，插穿保歷加通道底，但跌至近250天線，即之前約4.05元支持位後，暫時未見有進一步沽壓，如果守得住呢個水平，憧憬業務今年改善下，可能會再吸引到資金跟進。