【Now財經台】全國「兩會」即將開幕，被內地商務部形容為「消費四大金剛」嘅汽車、家電、家居、餐飲股，得餐飲股今日跑出。
紅蟻資本投資總監李澤銘指，睇返中央及地區政府依家嘅財政狀況，估計「兩會」期間未必會有大額補助，或刺激內需行業嘅政策，並預期下周內需板塊表現唔會有太大變化。
餐飲板塊中，去年底由海底撈(06862)以介紹形式分拆上市嘅特海國際(09658)，今日大幅跑贏同業，最多曾升近19%，創21.75元嘅上市新高，雖然特海早前發咗盈喜，但只係蝕少咗。
Alan提醒，特海估值偏貴，睇返未有盈利公司用來估算市值嘅市銷率(Price-to-sales ratio)，特海PS介乎6至7倍，同前兩年熱炒嘅科網股有得揮，亦係海底撈嘅3倍，特海主要負責海底撈海外業務，Alan認為有好多不明朗因素，又指如果只係複製喺內地嘅營運模式持續擴張，成本極高。
