【Now財經台】截至早上11時止，1小時內《彭博》用戶關注度上升最多港股，依次為創科實業(00669)、騰訊控股(00700)、中國移動(00941)、萬科企業(02202)及港交所(00388)。
創科全年收入幾乎冇增長，另全年少賺2%，但毛利率持續改善。早前，創科遭沽空機構狙擊，質疑公司嘅會計手法，「整靚」毛利率，股價應聲急瀉。創科出完業績後股價反彈，但高位有獲利盤，呢份業績可唔可以釋除投資者疑慮，呢份業績市場又收唔收貨？
椽盛資本投資總監曾永堅指，創科業績大致符合市場預期，公司毛利率靚仔係合理，據創科嘅解釋，產品組合、新產品價格等都係毛利率嘅增長動力，但佢提醒，沽空機構可能有後續指控。
股價方面，睇返創科技術走勢，依家仲未跌到舊年10月低位，即72元水平，估計暫時會喺74元至84元上落。
