【Now財經台】國務院最新發布《中醫藥振興發展重大工程實施方案》，同時具備中醫及線上醫療概念嘅固生堂(02273)，今日跟隨板塊造好，股價更創上市新高，一度高見58.65元。
固生堂上月中發盈喜，預告去年轉賺1.8億人仔，扣除上半年純利後，推算下半年純利1.24億人仔。摩根士丹利睇好固生堂今年將受惠於國策，以及潛在加快同業併購及業務擴張。
博威環球資產管理金融首席分析師聶振邦指，大致認同大摩嘅講法，又話內地認為長新冠症狀需要用中醫藥調理，相信公司短期會受惠於中醫需求上升，但要留意除咗治療新冠業務外，公司有冇新增長引擎。
聶Sir又話，對固生堂今年擴充業務嘅部署持中性看法，雖然公司現金充裕，但現階段仍未能估算收購返嚟嘅業務，係咪可以帶嚟強勁收入及增長。佢指出，固生堂喺60元水平有沽壓，建議等股價回落到48至50元先考慮買入。
