【Now財經台】港股喺3月第1個交易日大升，連帶多隻盈警股都有得升，當中包括美蘭空港(00357)，今朝短暫倒跌後，愈升愈有，集團預告去年轉蝕唔多過2.8億人仔，不過，摩根士丹利繼續叫增持，最主要係內地已逐步全面復常，加上免稅店收入回升等因素，似乎最壞時間已經過去。
英皇證券研究部總監陳錦興指，美蘭空港最壞情況都算過咗，內地防疫政策已大幅轉向，相信唔會好似之前咁嚴厲，美蘭空港係可以直接受惠於復常，對盈利復甦有幫助，有望重返疫前水平。
美蘭空港前年總收入中，航空業務佔約30%，如果買航空復甦係咪要揀美蘭空港？買免稅店係咪可以揀中國中免(01880)？佢就話，兩隻股份有少少唔同，美蘭空港主要睇機場營運及航空業，中免就係睇消費，前者始終唔係一個國際機場，估值相對較低，但後者估值相對較高，因為業務較集中，規模亦較大，如果喺航空相關股之中，想揀1隻細細哋又容易炒，美蘭空港係可以考慮。
