【Now財經台】中電控股(00002)中午出咗去年業績,總收入按年增長近20%,但基本開支大增33%,導致全年少賺89%。此外,由於上年澳洲燃煤供應緊張,令當地電廠停運,加上發電量不足,中電嘅澳洲業務虧損擴大至52億元,澳洲業務係咪會繼續拖累中電業績?
元宇證券投資總監林嘉麒表示,只要中電下半年業務及前景好轉,都唔太擔心開支大,因為開支係為增加未來收入做預備,而公司喺新能源業務上,可能係未來嘅動力引擎。
KK又話,市場最擔心嘅澳洲業務虧損,對比上年上半年,喺隨後半年都有大幅改善,營運盈利甚至係有得賺。不過,當地業務仍然面對發電量不足及電價下跌問題,加上公司嚟緊會喺當地增加資本投資,估計未來一、兩年業務表現會比較波動,更重要係,佔大部分盈利貢獻嘅香港及內地業務能唔能夠再做好啲,抵銷影響。