【Now財經台】堡獅龍國際(00592)(Bossini)計劃「2供1」，供股價0.37元，較上周五收市價折讓約21%，消息一出即震散股價，曾急瀉超過17%。公司指，有考慮過其他融資方法，但因為息口高企，最終選擇供股集資，同領展房產基金(00823)當日宣布世紀供股時嘅講法一樣，息口問題真係咁關鍵？早喺2年前，即大股東李寧家族控制嘅非凡中國(08032)入主後無耐，堡獅龍都提出過「2供1」，但公司一直以嚟都冇乜大動作，究竟今次集資目的係乜？
《香港股票財技密碼》作者梁杰文指，美息一路加上去，堡獅龍利息成本一定會增加，但公司計息嘅債唔多，呢個理由又講唔過去，佢估計，供股集資可能係準備借錢擴充業務，但睇返供股文件，有70%集資額都冇指明用途，好似堡獅龍都唔知未來有咩搞作，加上公司帳面現金超過2.5億元，相比之下，領展似乎更出師有名。
Mike又話，堡獅龍今次集資金額近5億元，大股東又冇承諾供股，都會影響小股東供股意欲。
