【now.com財經】坦白講今日都真係無乜心機出倉,嗰煲青紅蘿蔔湯同好友離世呢兩件事已經令我有一種喘不過氣嘅感覺。第二次面對同事好友離世,更是第二次的打擊。
知道往後嘅路都要繼續生活下去,抖啖氣唯有繼續。今朝揀咗隻恒指牛(53908)出嚟,Set好見小時圖上破10小時線(小時圖10線)先至出動。
整個上半場都無見過指數企得返上10小時線之上,而到下半場開市之後,恒指有將跌幅縮窄,不過五分鐘圖上見250分線線(五分鐘圖50線)再次成為阻力,同步亦未見到小時圖10小時線有被突破,似乎(53908)今日都只能夠坐下冷板凳。
日線圖上見,指數今日低開之後,順便失守埋250天線,呢條線自今年1月4日上破,然後全世界睇好港股可以脫離熊市魔掌之後,如今再次失守,唔通指數其實仲未離開熊市範圍?「睇嚟都係啦,日線圖條『下降通道』仲直過把間尺...」
望遠少少開個週線圖出嚟,見到目前週線圖上見指數向下,而下方未到保歷加通道中軸,目前有條50週線做下「架両」。
依家1點28分,恒指見跌幅再次擴大番少少,但速度仍然偏慢,好倉應該出唔到架啦,除非用嚟見Slow STC(14,3)落到超賣水平之後出嚟博行一趟Swing啦。
無咩事我抖陣先。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。