【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、美團(03690)、創科實業(00669)、比亞迪股份(01211)、新世界發展(00017)。
兩隻科企巨無霸騰訊及美團，今朝見過最少約2個月低位，喺美國加息預期升溫下，不利科技股，後市係咪易跌難升？「兩會」行情對中資科技股又有冇幫助？
富昌證券聯席董事譚朗蔚認為，投資者唔好太睇好短暫反彈或利好勢頭，因為大市下滑，ATM都會遭殃，其中美團跌幅顯著，股價上月初已跌穿1月遭騰訊派發除淨後嘅160元低位，現時要下試129元嘅11月低位。佢又話，美團轉弱可能係大市出現下一輪跌浪嘅先兆。
Stevan指，雖然內地對平台經濟、科網等行業嘅監管放寬，但較早前已經反映喺股價反彈上，「兩會」再有呢類消息，未必會構成額外嘅利好因素，反而近日市監總局要求外賣平台完善餐品描述、制止餐飲浪費，有機會令美團再試低位。
