【Now財經台】JS環球生活(01691)計劃分拆從事小家電產銷業務嘅全資附屬SharkNinja，喺美國獨立上市，JS又會向現有股東實物分派SharkNinja嘅股份，JS股價今日急瀉，午後一度重挫逾21%，低見7.5元，分拆計劃真係對小股東咁不利？
紅蟻資本投資總監李澤銘指，呢個分拆計劃同過往有好大分別，股價有咁大負面反應亦係少見，除咗係市場預期之外，其次係一啲技術上考慮，今次情況比特別，一間港股公司先分拆，再實物分派去到美股上市，的確好罕見，依家JS有逾8%由港股通投資者持有，對呢啲投資者嚟講係好大問題，佢哋嘅戶口係開喺內地券商，係唔可以買美股，之後收到啲美股應該點處理，係一個好大問題。
Alan又話，本港投資者都會有少少麻煩，如果唔係喺大型券商開戶，係trade唔到美股，呢啲投資者要再開美股戶口，呢個咁突然嘅分拆，係對唔少JS小股東造成幾大麻煩，依家唯一可以做就係沽貨。
