【Now財經台】創科實業(00669)被沽空機構狙擊，股份噚日急瀉後中途停牌，其後公司出通告強烈否認沽空機構嘅指控，股份今朝復牌一度反彈8%，之後升幅收窄。創科依家只得CALL及牛證，股價大跌後反彈，引伸波幅有咩變動？ 如果想避開縮窩風險，揀牛證係咪好過CALL？
摩根大通亞洲上市衍生產品銷售部主管張智卓指，創科不論窩輪及期權引伸波幅變動都幾大，噚日1個月左右到期嘅窩輪及期權，引伸波幅由約50%抽升至約80%，反映正股近日波動性較大，引伸波幅之後會唔會回落，要視乎正股上落幅度會唔會收窄。佢又話，做牛證部署都值得考慮，避免引伸波幅回落風險。
