【財經TOP SEARCH】聯想有條件喺AI市場分一杯羹？

【Now財經台】截至早上11時，1小時內《彭博》用戶關注度上升最多嘅港股，依次為聯想集團(00992)、騰訊控股(00700)、永利澳門(01128)、美團(03690)及港交所(00388)。

聯想上周公布季績後，股價延續過去1個月升勢，今朝更係最強勢藍籌，一度升7.5%至近8個月高位，半日升7%，報7.38元。

聯想係全球最大嘅高性能運算力供應商，市場憧憬公司的基礎設施方案業務及方案服務業務，將受惠於人工智能(AI)市場快速發展嘅大趨勢。

椽盛資本投資總監曾永堅認為，由聯想目前市盈率(PE)約6.6倍嚟睇，股價仲未反映到近月AI聊天機械人ChatGPT熱潮帶嚟嘅全新增長點。Jasper續指，AI聊天機械人需要高運算力支持，預期聯想嘅高性能伺服器同顯示卡(GPU)等硬件配套，將會受惠AI技術高速發展對硬件嘅需求。