【Now財經台】渣打集團(02888)及東亞銀行(00023)齊齊喺今日中午出業績，渣打去年多賺13%，雖然少過預期，但全年派息大增50%，東亞盈利倒退17%，但好過預期，派息就少咗。渣打股價午後抽升，東亞股價就向下，關鍵係咪在於派息？呢兩份成績表收唔收貨？
艾德金融聯席董事陳政深指，渣打表現其實唔太差，銀行股業績好著重細節及個別業務表現，渣打舊年第4季業績差過第3季，其實呢個係銀行常態，因為銀行一般喺年頭跑數，年尾就可以放假，而公司預算都集中喺年初做，只要第4季業績唔係倒退得太犀利，投資者都會收貨，而喺高息環境下，渣打作為一家國際銀行，股價會相對利好。
東亞方面，Ryan話，非利息收入倒退係意料中事，而東亞中國業務表現亦唔差，香港業務就透過保險分銷提升非利息收入增長，不過，單靠銀保市場唔係長遠之計，因為息口始終會見頂。
