【Now財經台】疫情持續近3年，唔少人都好耐冇飛過，不過，隨著大部分防疫措施解除，生活及經濟逐步復常，旅遊業亦回暖，喺旅遊業生態出現轉變下，東瀛遊(06882)嘅業務復甦情況，以及疫後經營方針又係點？
東瀛遊執行董事禤國全指，東瀛遊除咗旅行團及酒店業務，亦拓展咗網購，令公司喺疫情期間可以持續運作，未來會設置取貨部門，亦唔排除會擴大喺日本搜購嘅市場，令冇辦法去旅行嘅消費者，都可以喺香港買到心水日本產品。
至於旅遊業最關注嘅人手問題，Steven話，疫情前，東瀛遊喺香港有600名員工，疫情後期，仍有160名，由於公司有一定人手，所以疫後復常時，公司起步會好快。佢又話，依家員工人數已增至240名，即疫前約40%，生意額亦回復至疫情約40%，公司仍在招聘人手，期望年底前可以回復至疫情50%至60%。
