【Now財經台】體育用品股今日顯著受壓，其中以藍籌安踏體育(02020)表現最差，股價一度挫近8%，據聯交所資料顯示，有安踏股東將逾8400萬股轉入中央結算系統(CCASS)，每當有呢類轉倉大動作，就會惹嚟市場揣測，擔心公司配股或有股東減持，近日領展房產基金(00823)宣布世紀供股，係咪會惹嚟其他藍籌都可能有集資需要嘅憂慮？藍籌會唔會爆發「抽水潮」？
英皇證券研究部總監陳錦興指，市場確實有呢方面嘅憂慮，過去幾個月大市升勢及反彈力度都好强，之前內房股碧桂園(02007)配股兼有股東配股，再加埋近期嘅領展，難免令市場有聯想，因此，安踏股東將股份轉入CCASS嘅消息，係會觸發市場疑慮，導致股價顯著波動。
