【Now財經台】截至早上11時止，1小時內《彭博》用戶關注度上升最多港股，依次為美團(03690)、快手(01024)、騰訊控股(00700)、龍湖集團(00960)及港交所(00388)。
美團股價已連跌5個交易日，今日再傳嚟壞消息，就係抖音3月上線全國外賣服務，已喺北京、上海及成都做內部測試，但抖音話冇具體時間表，會逐步拓展試點市場，美團股價今日係咪反應過度？內地外賣格局及市場會唔會出現明顯變化？
獨立股評人譚智樂指，內地外賣市場一向競爭激烈，抖音係內地活躍用戶數一數二嘅平台，依家加入戰團，如果話冇影響，相信大行都唔會咁睇，睇返內地過去幾年嘅反壟斷政策，除咗美團及餓了麼，引入一間大型競爭者絕對有可能，所以美團股價今日跌咗落嚟係正常。
佢又話，如果睇返美團股價走勢，的確係比較差，亦跑輸大市，雖然成交大，但未見恐慌性拋售，短線而言，如果有貨，止蝕位可以擺150元，亦唔建議有呢啲壞消息傳出時博反彈，但只要唔跌穿150元，亦唔使太驚。
