【Now財經台】上星期有多隻電力股發咗盈利預告，其中，中國電力(02380)及華電國際電力(01071)發全年盈喜，華能國際電力(00902)及大唐發電(00991)就發全年盈警，但其實4家公司嘅盈利能力按年都有改善。有券商估計，動力煤價今年有望回歸合理水平，如果准煤電企業加電費，係咪代表呢啲公司今年嘅毛利率會顯著改善，全年盈利亦會大幅改善？
獨立股評人莫灝楠指，現時大部分電力股市盈率(PE)都係負數，因為電企好難瞓身投資新能源，因為新能源發電唔夠穩定，因此，無可避免要將部分發電產能投放喺火電，一旦煤價升，就會令電企「發1度電，蝕1度電」。
Casper又話，隨著俄烏局勢緩和，天然氣價開始回落，發電成本會慢慢下降，利潤空間就相對擴大，加上電價有機會上調，電企毛利率將會有改善。
