【Now財經台】新一份財政預算案將會喺2月22日出爐，其中一個焦點必定係會唔會再派錢，有唔同機構都建議再派消費券，政府舊年向每名合資格居民派1萬元電子消費券，涉及約660億元開支，回顧去年，派錢對刺激消費及經濟嘅作用有幾大？本港經濟喺過去4個季度持續萎縮，係咪反映消費券作用唔大？
資深經濟師羅家聰指，消費數據長遠要睇收入水平及就業前景，消費券只能發揮短期提振作用，加上政府分開幾期派，市民只係用消費券嚟填補日常開支，連本來最能直接受惠嘅零售銷售都冇明顯增長，反映派消費券對經濟增長嘅效益唔大。
KC又話，政府應集中資源幫窮人，而派發任何經濟援助前，可以考慮設入息或稅務審查，以收窄貧富差距。
