【Now財經台】股息3厘或以上、市值1000億嘅高息股中，上個月只得2隻股價向下，分別係恒生銀行(00011)及中國財險(02328)，但跌幅僅1%至2%，另有6隻高息股期內升幅達10%或以上，5大升幅股份分別係中國石油股份(00857)、中國海洋石油(00883)、中信股份(00267)、領展房產基金(00823)及太古地產(01972)，氣氛好似轉好，咩原因令中資、本地高息股齊齊升？
香港大學房地產及建設系客席副教授楊書健指，主要係資金持續湧入，上個月已見到1個月及3個月Hibor見頂，開始回落，1個月Hibor今日報2.47厘，3個月Hibor就低見3.53厘，雖然仍較去年同期高，但已較去年10月、11月高位回落唔少，每次有新股IPO，都會見到Hibor抽升，依家Hibor跌，反映有資金流入市場。
佢又話，依家向私人銀行借錢，港元較美元平200基點，代表機構投資者喺香港借錢嘅成本平咗，因此，令更多資金流入港股。
