【Now財經台】政府今早宣布，本港同內地下星期一就會全面通關，名創優品(09896)股價踏入1月持續強勢，不斷創上市新高，今日再借全面通消息，股價衝破30元關口，1月至今股價累升逾50%，係咪主要受惠於通關復常？
紅蟻資本投資總監李澤銘認為，同今日嘅全面通關消息關係唔大，因為集團分店遍東南亞、內地及香港，不太存在跨境消費情況。
名創優品2020年喺美國上市，舊年7月先嚟香港上市，即上市約半年，近期股價強勢，但交投其實唔算活躍，Alan認為，名創優品走強同公司有喺美國上市有關，因為外資炒內地復常，名創優品係其中一個主要選擇，所以香港呢邊嘅股價都會有得炒，但佢提醒，港股流通量比美股細好多，集團約30%股份擺喺香港，而當中約29%放咗喺滙豐，呢批極有可能係大股東嘅股份，意味喺本港市場流通嘅股份好少，買貨或沽貨時都會遇到一啲困難，但美國方面就冇呢個問題。
