【Now財經台】截至早上11時止，1小時內《彭博》用戶關注度上升最多港股，依次為碧桂園服務(06098)、騰訊控股(00700)、龍湖集團(00960)、雅居樂集團(03383)、中國平安(02318)。
上榜股有3隻係內房股，中央去年底密集式連發多支「箭」救內房，但近排較少有相關政策出台，僅零星地區有減房貸息之類嘅消息，到底係咩原因會「靜咗落嚟」？
華繼顯執行董事梁偉源表示，內房板塊好似打緊強心針維持生命嘅病人，當有政策出台時，就會吸引資金炒一轉，令股價出現短期急速反彈嘅情況，但當呢啲消息消化晒，又冇新政策出台，股價就會喺兩至3日內跌返落嚟。
佢又話，近期較受關注係中證監話希望促進內房平穩發展，但內容亦唔係新鮮事，反而市場最關心內房賣唔賣到樓，因為有強勁現金流先可以再吸引到投資者重新投資。
