【Now財經台】截至早上11時止，1小時內《彭博》用戶關注度上升最多港股，依次為小米集團(01810)、舜宇光學 (02382)、金沙中國(01928)、騰訊控股(00700)、銀河娛樂 (00027)。
今日上榜股份清一色係藍籌，頭兩隻都係手機相關股，近日三星發布新旗艦手機S23系列，有好多硬件升級，其中鏡頭升級至2億像素，手機設備股近期氣氛好，隨著內地復常，呢個板塊係咪值得睇好？
椽盛資本投資總監曾永堅指，智能手機喺舊年經過一系列低潮，喺2023年已經恢復需求。特別係內地市場，數據上嘅表現較差強人意。隨住經濟復甦，為投資者帶來需求憧憬，舊年各大品牌嘅智能手機都冇乜突破性亮點，冇驚喜自然難刺激需求。睇返數據，自從中國放寬抗疫措施，市場就憧憬智能手機銷售好轉，佢估計，一眾手機設備股中，舜宇短線表現會較好，並預期舜宇可企穩250天線，以及繼續有資金湧入推升股價。
