【Now財經台】龍源電力(00916)噚日收市後發盈警，預期去年少賺最多40%，純利最多近52億人仔，龍源股價早市一度挫近7%，但午後不斷收復失地，尾市僅跌逾1%，唔少分析睇好今年風資源會較去年有改善，加上資產減值僅屬一次性，應該點解讀呢個盈警？龍源股價唔使睇得太淡？
博威環球資產管理金融首席分析師聶振邦指，其他新能源股今日表現唔差，個別更升超過4%，但龍源就跌咗落嚟，反映業績的確唔係咁睇好，參考返公司舊年第3季業績，全年純利反而少過首3季，反映第4季其實係「見紅」，聶Sir估計，市場對龍源嘅業務發展會有重新嘅考量，呢方面投資者要多加留意。
