【now.com財經】似乎鷸蚌已經爭完，由指數喺今朝大約10點50分，失守22,000點水平之後，已經分出勝負，指數愈來愈靠近牛證街貨嘅同時，保歷加通道口亦見拓闊，Slow STC(14,3)出現超賣再超賣的走勢。下半場開市之後亦未見止瀉，睇嚟21,700至21,799點嘅重貨牛有啲凍過水。
依家1點12分，恒指暫時最低見過21,758點，點數上確認失守10天線水平，只係技術上暫時未見到指數跳落10天線以下，可能聽日返嚟會見到，但唔緊要，睇返恒指日線圖上第一同第二個浪嘅完成位都係20天線，只係第三個浪拉到上10天線，所以大家先至會有一個預期指數都會同樣地踩得住10天線。
換上保歷加通道則見目前整條保歷加通道仍然向上，不過通道口有收窄嘅情況。先是保歷加通道口無再拓闊，比唔到條件Slow STC(14,3)出超買再超買啦，其次係保歷加通道口收窄其實係反映出指數被限制咗上行空間(依家跌緊 >> 合理)嘅同時，亦都係限制住指數下跌空間(保歷加底線向上中)。
Base on 依家呢個走勢，如果指數落到20天線時真係可以踩得住條線回一回氣的話，等保歷加通道口再拓闊返就可以重新再行「一浪高於一浪」呢條路；但如果指數失守由去年10月底至今一直支持住指數嘅20天線的話，再配合唔知做乜佢個通道口忽然拓闊返，咁呢個升浪「可以完」。
的確指數由10月31日低位14,597點起標計到上個星期五(1月27日)高位22,700點，用咗差唔多三個月時間累升8,103點或55.5%，咁大幅度嘅上行比返啲時間個市調整下，其實都唔係好mean架咋。
拉遠少少個恒指圖，噚日喺作戰室都有畫過，就係如果由上年4月開始畫，由4月至7月，指數行咗個「圓底」，然後由7月到今年1月，指數行出一個接近「V型反彈」走勢出嚟，呢兩個嘢併埋一齊的話，「頭肩底」成形咗2/3，若然今次指數再一次行出同上年4月至7月咁上下大嘅「圓底」，「頭肩底」則成立，數學上量度升幅相當於頭部最低嘅位置向上拉一條直線至頸線為止，即14,597點至約22,500點左右，講緊都有7,903點架。
成唔成到形我唔知，但如果要成形的話，指數有可能再下穿多一次20,000點，或甚要見19,500點，因為要做返一個同上年4月至7月咁上下大嘅「圓底」先可以成形嘛。
大膽假設，小心求證本來就係做傳媒嘅本能。呢個大膽假設會唔會喺三個月之後出現？如果係嘅話即係4月有可能完成「右肩」，咁五窮六絕七翻身就會變成Buy in May啦！
瞓醒啦！開工啦，點半啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
