【Now財經台】洪九果品(06689)股價連續第2個交易日捱沽，今日一度瀉逾30%，低見25.5元，「死因」係集團上周宣布，擬增發逾6億股H股，相當於公司H股已發行股本2倍，點解市場反應咁大？阿里巴巴(09988)係洪九H股嘅第2大股東，持股逾11%，雖然有阿里「光環」，但都止唔到瀉，投資者係咪擔心阿里會帶頭減持？
元宇證券投資總監林嘉麒指，股份流通量突然增加，一定對股價造成壓力，加上洪九以資本公積轉增股本，將一部分利潤轉發新股，會加重每股盈利壓力。集團上市唔夠半年，股東都擔心公司會唔會再玩財技。
KK認為，唔排除大股東會沽貨，投資者亦憂慮IPO嘅半年禁售期就過，大股東如阿里、招商局及有名氣嘅投資基金會沽貨，依家佢哋各持有數千萬股，今日成交額只得500萬幾股，估計未來仲有排沽。
