【now.com財經】今朝失咗隻諗住博A股開紅盤都有帶挈旺到港股少少嘅好倉，唔緊要，圍埋計返條數都唔係輸得好過份，再加上明知過weekend所以注碼上都有控制一下，感覺只係將粒糖放返入個全盒度啫。
今日作戰室上半場全程淡倉，無計，見五分鐘圖指數喺朝早兩度未能重上中軸就知咩事，所以只能夠出到淡倉。
睇返恒指日線圖，見到指數喺上個星期五(1月27日)高位做過22,700點之後，今日開始向下，留意返上個星期四(26日)裂口高開嘅範圍係22,051點至22,329點，以截至今日上半場內低位22,320點計，指數算是已經進入咗呢個裂口範圍。至於其他技術指標，見保歷加通道有開始收窄情況，指數目前仍企於五條主要平均線之上，10天線目前水平為21,953點，假設指數高位回落到10天線有支持的話，先是由去年10月底位到依家形成嘅「上升通道」未有被破壞，同時又補回返上個星期四(26日)嘅裂口，似乎有一種「完事，繼續」嘅感覺。
再睇返恒指牛熊證街貨圖。今日見牛證第一層為21,700至21,799點，屬重貨區，儲咗有相當於808張期指街貨。熊證第一層為22,700至22,799點，有405張期指街貨；重貨區擺咗喺23,000至23,099點，有1,026張期指。以呢個圖見，牛熊兩邊差距有成千點，而中間位見22,249.5點，以中午收市價22,320點計，指數本身靠近熊證嘅，依家跌返落去中軸水平。
再睇埋今日(30日)新上市嘅牛熊證。熊證未見有新再貼價嘅近熊上市，換言之聽日(31日)返嚟最貼價熊證街貨層仍然係22,700至22,799點。不過今日見到有最貼價新牛上市，收回價見22,044點，即係話聽日返嚟會見到牛證有新街貨層，最貼價拉到上22,000至22,099點。如是者計一計聽日(31日)牛熊中間位，就會上移至22,399.5點，同以中午收市計，指數更加踩正中間位。
下半場開市，指數向下再插，跌幅擴大至跌逾400點，依家1點7分，指數見22,284點，指數已經橫跨咗預計嗰條牛熊中間線之餘，確認到指數由近熊變成近牛。
呢個大方向暫時嚟講似乎對淡倉有利，只不過問題在於五分鐘圖至小時圖都見唔到Slow STC(14,3)有位比隻淡倉出到場。恒指熊(69624)，收回價22,750點，同現價有逾430點差距，槓桿有約48倍夠做DT，不過，要等Slow STC(14,3)上返超買位先至落場的話，可能有排甚至睇唔到。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
