【now.com財經】今朝揀咗隻恒指熊(68510)出嚟，諗住進取嘅可以見指數受制於保歷加中軸而小注出動，博一博見指數落到保歷加通道低線；安全嘅就等返五分鐘圖條Slow STC(14,3)由超買位向下再Swing多次。結果，恒指同噚日差唔多，朝早開咗市行咗一小段路之後，就開始出現橫行嘅情況。
無辨法，咁橫行嘅情況坦白講比你落到場都係無意思，上半晝作戰室朝早完成咗兩三注之後就無再出動過，諗下Lunch食咩暖身仲好。
不過，悶悶下臨近完場前15分鐘見指數忽然向下急插一下落到保歷加通道底線後，Slow STC(14,3)有似觸底嘅情況，指數落返去保歷加「下降通道」兼停止通道口拓闊出好倉的確係符合Swing Trade做法；只不過咁，如果指數悶局或牛皮的話，中軸唔破亦都係新一個吼位出淡倉嘅時機，無所謂，都係一齊等吓下半場佢發生咩事再算。
下半場開市之後其實指數都未見有好大變動，目前只係下半場開市後10分鐘，恒指仍然處於保歷加下降通道裡面運行，而保歷加通道口亦未見有任何拓闊嘅情況，中軸會唔會做成阻力推得返指數向下而乘機出到隻(68510)，怕且都要等到點半先知。
唔落場無損失嘅，反正市咁悶，落咗場迫自己仲有睇住佢可能仲辛苦。
望望月曆下個星期一(1月30日)A股終於都開市，北水回歸再加上對A股嚟講下個星期一先至係兔年首個交易日，如果有興趣博A股開紅盤帶動埋港股造好嘅話，臨完場前10分鐘睇下小注隻恒指牛(50391)，收回價21,700點，同現價有逾850點差距，市場上第三貼價牛，唔揀到咁盡係因為最貼價嗰兩隻嘅街貨已經超過50%，有增發情況會發生。記得今日星期五，要過夜的話係過一個周末，注碼上留意一下啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
