【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、小米集團(01810)、碧桂園(02007)、龍湖集團(00960)、中芯國際(00981)。
碧桂園獲民生銀行(01988)授出信貸額度，最高達5000萬美元，股價今朝約10時開始發力，一度升逾8%，高見3.3元，中午收市報3.16元，升3.6%，集團攞到信貸額度，係咪畀到市場信心，帶挈股價炒上？
大華繼顯執行董事梁偉源指，5000萬美元信貸額度唔算特別多，對碧桂園幫助亦唔係好大，其實去年唔少內銀都向內房提供一定信貸額度或支持發債，但值得留意係，之前都係以人民幣計，但今次碧桂園係獲得美元信貸額度，而且係首次，所以都會帶嚟一定支持。
Steven又話，碧桂園去年曾經配股集資約11億美元，今次獲5000萬美元信貸額度，的確對公司幫助唔大，要提升投資者信心，除咗信貸額度，更最重係賣樓情況，如果過年後賣樓情況冇改善，投資者仍會擔心資金鏈有壓力。
