【now.com財經】坦白講今朝走咗隻恒指Call(11738)之後，喺作戰室完全無做過第二注動作，主要因為指數今朝開高開後一直Keep住大約100點左右嘅波幅上落，睇個五分鐘圖就見到指數橫行嘅情況，唔怪得佢嘅，只怪今日可能仲未有北水嘅出現，所以港股都只係「循例」地開出個紅盤，叫做開工大吉咗先啦！
至於今朝揀嘅恒指牛(50363)，本來打算見指數挨得到去五分鐘圖50分鐘線(五分鐘圖10線)後有支持就出動。都唔駛睇返今朝Patreon出文時間，到依家下半場就算開咗市16分鐘，指數仍然都係橫行中，而保歷加通道以目前計，頂底線22,467點/22,383點，只係相差84點。Day Trade難。
不過咁，大方向仍然比較傾向出好倉，因為恒指目前踩咗入熊證街貨層之餘，牛證第一層21,700至21,799點仍然同現價有逾700點嘅距離。只係小心嘅係今日指數開紅盤無啦啦彈高逾300點，明日都係未有北水，要下個星期一(1月30日)A股開返市之後先至見得到，所以都唔排除呢兩日都會有咁嘅情況，就係開市彈起一下之後就橫行等收市。所以呢兩日出倉嘅要比多少少耐性啦。
索性等埋阿A返嚟先至開工嘅當然可以啦，今朝一注開紅盤反正都攞咗頭彩囉。
再次祝各位讀者兔年行大運，瓣瓣都得心應手！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
