【Now財經台】截至早上11時止，1小時內《彭博》用戶關注度上升最多港股，依次為中國海洋石油(00883)、騰訊控股(00700)、中國石油股份(00857)、中國移動(00941)及美團(03690)。
騰訊今朝一開市已經見咗半日高位390元，中午收市升逾1%，報388.6元，公司噚日繼續喺高位做回購，涉及92萬股，每股平均價381.45元，涉資約3.5億元。不過，好快就上返南非大股東Naspers於2018年首次減持價405元，係咪對股價有好大阻力？
大華繼顯執行董事梁偉源認為，騰訊近日升勢主要係受獲批內地遊戲版號嘅消息刺激，而公司月初派發美團股份作特別息後，要喺騰訊股價之上加返近20元價值，所以騰訊現價實際上已升至410元水平，因此，Naspers減持價405元應該唔會構成阻力。
