【Now財經台】據內媒引述消息報道，泰格醫藥(03347)完成收購歐洲醫藥外包研發(CRO)公司Marti Farm，大和資本認為，泰格可透過併購及對外擴張活動，令公司嘅註冊業務持續強勁增長。
泰格股價今日衝上近13個月高位，收報110.3元，自去年10月低位50.4元，累計反彈近1.2倍。
耀才證券研究部總監植耀輝指，雖然泰格喺內地係行業龍頭，但海外業務收入佔比仍不及同業康龍化成(03759)及藥明康德(02359)，又提及康龍化成嘅海外收入佔比達70%至80%以上，佢相信泰格未來會有更多海外併購活動。據集團舊年中期報告顯示，泰格海外業務收入增速比內地更快，海外國家及地區收入佔比則擴大至53%。
大和首次給予泰格「買入」評級，目標價120元。此外，中信里昂亦上調咗泰格目標價至95元，但較現價低14%。Stanley認為，大行畀嘅目標價合理，雖然泰格股價兩年前一度逼近200元，但受中美關係影響，行業前景冇當年咁樂觀，佢預期泰格今年可跑贏同業，但要上返2年前高位就有難度。
