【Now財經台】截至早上11時止，1小時內《彭博》用戶關注度上升最多港股，依次為快手(01024)、騰訊控股(00700)、中國恒大(03333)、友邦保險(01299)、雅居樂集團(03383)。
友邦係其中一個今日恒指跌幅大幅收窄嘅功臣之一，摩通最新重申友邦「增持」評級及103元目標價，指隨著內地跟香港通關，險企對內地客戶嘅離岸壽險銷售會顯著復甦，反觀同樣做內地客嘅保誠(02378)，相對於友邦現時估值折讓並唔合理，保誠股價今年累升12%，友邦僅升0.5%，點睇保誠同友邦嘅估值？股價反映咗幾多通關因素？
獨立股評人沈慶洪指，好難直接比較友邦同保誠，因爲產品唔同，同埋睇返保誠每日交投量，相對於友邦係少啲，所以兩者股價會有差異。
Patrick又話，香港跟內地通關後，市場一定憧憬內地客會嚟香港投保，但香港過去3年一直處於封關狀態，3年後嘅今日，到底內地人投保意欲、模式有冇改變，都係一個未知數，相信要等農曆新年後，內地居民返完鄉下，重回自己省市後，會唔會再嚟香港？要到時先知道實際情況，因此，依家只係一個憧憬，友邦股價短期會喺90元有少少阻力，直至睇到好多內地居民嚟投保，到先會可以企穩90元樓上。
