【Now財經台】永達汽車(03669)發盈警，預期去年淨利潤按年最多少賺43%，以2021年賺逾24億人仔計，即去年賺最多逾14億人仔，係2018年以嚟最少，其實永達去年純利水平仲少過疫情前，反映除咗受疫情影響外，係咪因為新能源車市場流行用直銷模式，削弱咗傳統汽車代理嘅價值？
元宇證券投資總監林嘉麒指，直銷模式的確有好大影響，對內地分銷商嚟講，賣車可能係收入一部分，但盈利主要來自售後服務、維修等，如果新能源汽車銷售較高，售後服務保養期可能長啲，加上電動車同傳統車比較，傳統車嘅壞車問題種類較多，電動車就較少，因為機械同電子系統唔同，經銷商唔係每款車都識維修，車主一般會將汽車攞返原廠維修，呢方面都有啲影響。此外，疫情對經銷商影響亦較大，而呢兩個因素都係影響永達嘅主因。
