【Now財經台】紅星美凱龍(01528)股價今日勁升，一度飆逾38%，有消息指，控股股東落實股權轉讓，並已簽框架協議，控股股東向廈門建發出售不逾30%集團A股。此外，阿里巴巴(09988)約3年前同紅星買入可換股債，而呢批CB就快到期，阿里有意高價換股接貨，阿里股價近排「醒返」，係咪同呢個消息有關？
《香港股票財技密碼》作者梁杰文指，對紅星美凱龍大升有啲意外，因為之前都有消息指，集團會出售部分股份，所以都唔係新消息，而呢批CB本身行使價好高，市場普遍認為，股價短期好難升穿行使價，紅星美凱龍最終可能會贖回呢批CB，雖然公司降低咗換股價，但阿里意外地願意調整換股價，市場解讀為一個正面因素，可能阿里準備換股，因為股價近期升完呢浸後，距離換股價又近咗。
Mike又話，阿里股價踏入新一年彈咗30%，負面因素開始消退，而當紅星美凱龍呢類二、三線股有消息，又泊到大碼頭就帶挈股價大升。
